يا ترى أسعار الدهب رايحة على فين خاصة بعد قرار الفيدرالي الأمريكي بتثبيت أسعار الفائدة، هل القرار ده ممكن يرفع أسعار المعدن الأصفر ولا ممكن نلاقي موجة هبوط مفاجئة؟

في الساعات الأخيرة، أعلن مجلس الاحتياطي الفيدرالي الأمريكي عن تثبيت أسعار الفائدة، بدون تغيير، وده أثر بشكل كبير على أسعار الدهب عالميا وفي مصر كمان.

واللي حصل إن سعر الفايدة مازال ما بين 4.25% ل 4.50%، والبنك الفيدرالي بيفكر بجدية في خفضها الفترة الجاية لو التضخم فضل يهدى، والكلام ده معناه إن الفايدة القليلة بتقلل جاذبية الاستثمار في الدولار والسندات، وبتخلي الدهب يرجع ياخد نجوميته.

عشان كده شهدت أسعار الدهب تذبذب بعد قرار الفيدرالي الأمريكي، و سجلت الأونصة 2375.5 دولار، أما بقى الدهب عيار 24 فسجل 5491 جنيه، وعيار 22 هو كمان ب 5034 جنيهؤ، أما عيار  21 اللي هو اكتر شراءا في مصر فسجل 4805، وعيار 18 ب 4119 جنيه، وكمان الجنيه الذهب بقى ب 38440 جنيه.

أما سعر الذهب في مصر اليومين دول، فحصل له تراجع واضح في الأسعار، لكن التوقعات بتقول إن فيه احتمال لتحسن قريب، خصوصا لو الدولار العالمي فضل ضعيف أو حصل أي تصعيد سياسي أو اقتصادي.

عندك كمان، سعر الدولار العالمي اللي حصل له تراجع طفيف الأيام اللي فاتت، بس مفيش تأكيد إذا كانت دي بداية اتجاه هابط ولا مجرد تصحيح مؤقت.

يعني الصورة كلها لسه ضبابية شوية، وكل تحليل بيقول حاجة، لكن فيه اللي شايف إن ده وقت كويس لشراء الدهب قبل ما الأسعار تعاود الارتفاع، وفيه اللي بيقول لأ، استنى لما الأمور تستقر أكتر.

بس الحقيقة اللي مفيش فيها خلاف هي إن قرار الاستثمار في الدهب قرار شخصي، يعني بيعتمد على أهدافك ونظرتك للمستقبل وكمان مستوى المخاطرة اللي تقدر تستحمله.

والأهم من كده، هو إنك تتابع المتغيرات يوم بيوم، لأن السياسة والاقتصاد بيلعبوا لعبة شد وجذب، وكل قرار ممكن يقلب السوق في لحظة.

وفي النهاية، نقدر نقولك إنك لو ناوي تستثمر في الدهب، فلازم تتابع الفايدة اول باول وكمان تبص على حركة الدولار، وافهم السوق كويس، واختار التوقيت الصح وخد قرارك.