الوقت الحالي كل الناس عندها اهتمام باسعار الذهب.. ياتري الاسعار رايحة علي فين مع بداية السنة المالية الجديدة.. وهل الاسعار هتكمل في الزيادة ولا هترجع تنخفض تاني.. وهل الوقت الحالي مناسب للبيع ولا الشراء.

من بداية  2025 اسعار الذهب واحدة من الحاجات اللي بتشغل بال اغلبية الشغل المصري كله سواء كانوا مهتمين بالاستثمار في المعدن الاصفر أو لا، خصوصا أن اسعار الذهب من بداية السنة الحالية وهيا بتسجل ارتفاعات قياسية والإقبال علي شراء الذهب في الوقت الحالي تخطي كل الحدود خصوصا بعد قرارات البنك المركزي بخفض أسعار الفائدة علي مدار اجتماعين متتاليين.

طيب اية اسباب ارتفاع اسعار الذهب في مصر في الفترة اللي فاتت؟.

الحقيقة في أكثر من سبب لارتفاع اسعار الذهب في مصر خلال الكام شهر اللي فاتوا أولهم ارتفاع سعر صرف الدولار مقابل الجنيه، خصوصا أن كل ما سعر الدولار يرتفع أمام الجنيه، ترتفع معاه تكلفة استيراد الذهب خصوصا أن سعره عالميا بيتحسب بالدولار، ومصر بتستورد نسبة كبيرة من الذهب سواء كان في صورته خام أو مشغول، وكل ما قيمة الجنيه تتراجع فده بيؤدي تلقائيًا إلى رفع سعر الذهب محليا.

تاني سببب بتؤدي لأرتفاع اسعار الذهب في مصر هيا  ارتفاع الأسعار العالمية للذهب، خصوصا أن الذهب بيعد سلعة دولية، وفي حالة ارتفاع الأسعار في البورصات العالمية زي الحروب أو الأزمات المالية، بترتفع معاه أسعار المحلية في مصر، وفي توفعات كتيرة بتأكد أن سعر الأونصة مرشح للوصول للأكثر من 4 الاف دولار بسبب الطلب من البنوك المركزية العالمية علي شراء الذهب، ده غير  انتشار التوترات الجيوسياسية.

ثالث سبب ادي لزيادة اسعار الذهب في مصر هيا زيادة الجمارك والضرائب ومصاريف الدمغة، خصوصا أن إي تعديل في الرسوم الجمركية أو إضافة ضريبة على الذهب المستورد أو المشغول بيؤدي مباشرة لزيادة السعر النهائي، ده غير أن زيادة الاسعار بسبب الدمغة والليزر وتعديل تكاليف التصنيع كان سبب اساسي في زيادة الاسعار علي المستهلكين .

رابع سبب لزيادة اسعار الذهب المحلي هو انخفاض الذهب المعروض في السوق المصري نتيجة قلة الاستيراد أو التخزين عن الأفراد والتجار وده بيكون واحد من اهم اسباب الزيادة في السعر المحلي للذهب، وده بيؤدي لحاجة خبراء الاقتصاد بيسموهما المضاربة داخل السوق المحلي وده معناه أن  التجار بيرفعوا الأسعار بشكل غير رسمي وقت وقوع نقص في المعروض.

طيب ايه توقعات اسعار الذهب في مصر مع بداية السنة المالية الجديدة؟.

كل التوقعات بتأكد أن أسعار الذهب في مصر هتفضل متذبذبة بسبب التوترات والتغيرات الجيوسياسية المنتشرة في العالم كله، واللي هيا السبب الأساسي في ارتفاع الاسعار خلال الايام اللي فاتت، وفي حالة عودة حركة الهدوء الجيوسياسي للعالم، فالاسعار مرشحة من جديدة للانخفاض وان كان هيكون انخفاض نسبي ومش بارقام كبيرة.