مصر علي مدار السنة اللي فاتت تحولت لباب رئيسي لكبري الاستثمارات الأجنبية للدخول للسوق المصري.. ياتري مصر وصلت لكام استثمارات أجنبية مباشرة.. واية مستهدفات الحكومة من الاستثمار في الفترة اللي جاية.

علي مدار السنين اللي فاتت وتحديدا من بداية الفترة الرئاسية الجديدة للرئيس عبد الفتاح السيسي، والحكومة استهدفت جذب كبري الاستثمارات الأجنبية للسوق المصري وده واحدة من الاهداف الرئيسية للحكومة حاليا، ضمن خطة تنويع الاستثمارات المستهدفة، وأن الاقتصاد المصري ميكونش بيعتمد علي مصدر أو مصدرين للدخل الدولاري لمصر من الخارج زي ما كان بيحصل في السنين اللي فاتت.

طيب اية فايدة الاستثمار الأجنبي للاقتصاد والمواطن المصري ؟.

لما مستثمر أجنبي ييجي يحط فلوسه في مصر، ده معناه إنه هيفتح شركة مصنع أو مشروع، وده معناة أنه هيحتاج ايدي عاملة، وهنا الحكومة يبقي وفرت فرص عمل جديدة للشباب بدل ما يقعدوا سنين طويلة مستنين الحكومة توفر لهم فرص عمل بالقطاع العام، وكمان الاستثمارات دي بتجيب عملة صعبة زي الدولار واليورو للاقتصاد المصري، وده بيساعد في تقوية الجنيه، وبيقلل الضغط على الاقتصاد، غير كده، المستثمرين الكبار لما بييجوا، بيجيبوا معاهم تكنولوجيا حديثة زنظم جديدة وأفكار مش معروفة في السوق المصري، وإحنا كدولة بنتطور أسرع، والصناعة المصرية معاهم بتنتقل من مرحلة لمرحلة تانية كبيرة قدام.

طيب الحكومة بتستهدف استثمارات أجنبية كام بالظبط؟
علي مدار الفترة اللي فاتت، الحكومة استهدف تيسير الإجراءات وتسهيل التراخيص علي المستثمرين، وقدمت حوافز ضريبية وتسهيلات في الأراضي كل ده علشان نخلي المستثمر يختار مصر بدلا من باقي الدول اللي بتقدم عروض للمستثمرين علشان تجذبهم للاسواق بتاعتهم.

الحكومة بدأت خطة جذب الاستثمارات الأجنبية للسوق المصري عن طريق تقديم حوافز وتسهيلات في الحصول علي الاراضي اللازمة لبناء المشروعات، وكمان تسهيلات تانية في الحصول علي التراخيص اللازمة عن طريق الرخصة الذهبية واللي بقت كافية وشاملة للمستثمرين للبناء والتشغيل.

الشغل اللي قامت بيها الحكومة خلت الاستثمارات الأجنية في السوق المصري ترتفع من المرتبة 32 إلي المركز الـ9 عالميا بين أكثر الدول جذبًا للاستثمارات الأجنبية المباشرة في 2024 بحجم تدفقات بلغ 47 مليار دولار، مقارنة بـ10 مليار دولار بس في عام 2023.