إزاي مصر بتجهز نفسها للأيام الصعبة؟ وايه دور لجنة الطواريء اللى تم تشكيلها في تحضير البلد لأي سيناريو متعلق بتطور الأحداث فى المنطقة بعد تصاعد المواجهة بين اسرائيل وايران ودخول أمريكا على الخط ؟  وإيه اللي بتعمله الحكومة المصرية عشان تأمن البلد وأهلها من أي خطر محتمل؟

في ظل التوتر اللي في المنطقة .. مصر بتاخد خطوات استباقية ومهمة جداً .. مش مجرد رد فعل .. لأ .. دي خطوات بتدل على استعداد وجاهزية لأي سيناريو.. أهم الخطوات دي هي لجنة الطوارئ.. و دي كيان بيضم أهم القيادات في الدولة.. كل واحد منهم له دور محدد ومهم جدا.

اللجنة دي بتجتمع بشكل دوري .. وبشكل طارئ لو في أي مستجدات خطيرة .. دورها الأساسي هو متابعة الوضع في المنطقة لحظة بلحظة.. وتحليل كل التطورات.. سواء كانت سياسية أو عسكرية أو اقتصادية.. عشان تقدر تاخد القرارات الصح في الوقت الصح.

و لو حصل أي تصعيد مفاجئ .. لا قدر الله .. اللجنة دي بتكون هي العقل المدبر اللي بيشتغل على طول .. عندها خطط بديلة لكل الاحتمالات .. سواء كانت خطط لإجلاء رعايا .. أو لتأمين الحدود .. أو لتوفير الاحتياجات الأساسية للناس .. كل حاجة بتكون متحضرة ومدروسة كويس أوي.

والرئيس السيسي وجه الحكومة بضرورة اتخاذ كل الاحتياطات المالية والسلعية ذات الصلة في ظل التطورات الجارية وحالة التصعيد اللي بتشهدها المنطقة وانعكاسات الحرب بين إيران واسرائيل.

استعدادات مصر مش بس بتقتصر على لجنة الطوارئ .. لأ .. الموضوع أكبر من كده بكتير .. الدولة بتشتغل على أكتر من مستوى عشان تكون جاهزة لأي سيناريو..

أول حاجة .. المستوى الأمني والعسكري .. وده الأهم طبعًا .. القوات المسلحة المصرية في حالة تأهب قصوى .. الحدود مؤمنة بالكامل .. فيه تدريبات مستمرة على أعلى مستوى عشان أي تهديد يتم التعامل معاه بسرعة وكفاءة .. وده بيطمنا إن بلدنا في أمان .. وإن جيشنا قادر على حمايتنا وحماية مقدراتنا.

وتاني حاجة .. المستوى الاقتصادي .. يمكن ده اللي بيشغل بال ناس كتير .. هل لو الأوضاع اتأزمت .. اقتصادنا هيستحمل؟ .. الإجابة آه ..لأن الدولة الفترة اللي فاتت اشتغلت على تنويع مصادر الدخل .. وما بقتش تعتمد على حاجة واحدة بس .. السياحة .. قناة السويس .. التحويلات .. الصادرات .. كل دي مصادر بتدي للاقتصاد المصري قوة ومرونة أكبر على مواجهة أي صدمات خارجية.

كمان فيه احتياطي نقدي قوي من العملات الأجنبية في البنك المركزي .. وده مهم جداً عشان نقدر نغطي احتياجاتنا من الاستيراد .. وكمان عشان نحافظ على استقرار سعر الجنيه قدر الإمكان في أي ظروف طارئة..

تالت  حاجة .. توفير السلع الأساسية .. وده جانب مهم جدًا للناس .. محدش فينا يحب يحس إن فيه نقص في الأكل أو الشرب أو أي سلعة أساسية .. عشان كده الدولة عاملة حسابها كويس أوي .. فيه احتياطي استراتيجي كبير من السلع الأساسية زي القمح والزيوت والسكر .. يكفي لفترات طويلة .. وده بيطمنا إننا مش هنعاني من أي نقص لو لا قدر الله حصل أي ظرف طارئ.

مصر مش بتشتغل بس على المستوى الداخلي .. لأ .. ليها دور كبير جداً على المستوى الدبلوماسي .. يمكن ده اللي كتير مننا ما يعرفوش .. مصر بتلعب دور مهم جدًا كـ صوت للعقل والحكمة في المنطقة.

وزارة الخارجية المصرية بتتحرك بشكل مكثف .. فيه اتصالات مستمرة مع كل الأطراف الفاعلة في الأزمة .. سواء كانت أمريكا أو إيران أو إسرائيل .. الهدف الأساسي هو تخفيف حدة التوتر .. ومحاولة إيجاد حلول سلمية للأزمة .. لأن مصر عارفة إن أي تصعيد عسكري في المنطقة هيكون له عواقب وخيمة على الجميع .. وده دور مصر التاريخي في حفظ الاستقرار والأمن في المنطقة.

المواقف المصرية واضحة وصريحة .. دايماً مع التهدئة .. ومع إعلاء صوت الحوار .. وضد أي عمل عسكري ممكن يجر المنطقة كلها لكارثة .. وده بيخلي لمصر ثقل كبير في المفاوضات الدولية .. وبيخلي صوتها مسموع ومحترم.

كل ده بيورينا إن مصر مش ساكتة .. وإحنا مش لوحدنا في مواجهة أي خطر .. فيه خطط واستعدادات على أعلى مستوى .. فيه قيادات بتشتغل ليل ونهار عشان تحافظ على أمننا وسلامتنا..

لكن في نفس الوقت .. وعينا وإدراكنا مهم جداً .. لازم نكون متابعين للأحداث .. وما نسلمش ودانا لأي إشاعات أو أخبار كاذبة ممكن تهدف لإثارة القلق أو البلبلة .. المعلومات الرسمية هي مصدرنا الوحيد .. ودعمنا لبلدنا هو أقوى سلاح ممكن نواجه بيه أي تحديات..

مصر بتجهز نفسها للأيام الصعبة .. مش بس عشان تواجهها .. لكن عشان كمان تخرج منها أقوى وأمتن .. وبإذن الله .. ده اللي هيحصل .. كل اللي محتاجينه هو الثقة في قيادتنا .. ودعمنا لبعض.